曼谷泰享受 男士必試英式紳士理髮店

女人有「手袋控」，男人都有「西裝控」

我老公正係呢種～平日使錢鬼咁慳，但買起西裝上來真係絕不手軟。

佢著衫可以買淘寶，但講到買西裝一定搵靚料度身訂造，就以呢件西裝為例，一向慳家嘅佢居然捨得用過5位數字去買一套西裝.... 唔緊要嘅，係人都有自己嘅嗜好，做伴侶嘅唯有支持下～～

前排同佢去咗曼谷，捐窿捐罅竟然比我哋搵到間具英式風味嘅The Artisans，擺咗套西裝喎，當然要入去睇下有無正嘢啦～

點知店中店入面竟然有間英式紳士理髮店，向上望望個招牌，原來係來自英國，專幫人打造紳士形象嘅老牌理髮店Truefitt & Hill ～

唔講唔知，原來呢間於1805年創立嘅理髮店，仲曾經打入健力士紀錄，店內仲排住好多舊照片，成間店都充滿住懷舊氣息。

一直都知另一半好想試下呢種英式剪髮加剃鬚服務，奈何係香港剪佢覺得實在太貴，普遍濕剪都要$600up。但我估係曼谷呢種地方，應該唔會貴得去邊掛～果然，一睇價錢牌，大家嘅咀角忍唔住向上戚～～ 最出名嘅Royal Haircut’都只係1,500泰銖（約HK$380)，仲要係搵手勢最好嘅Master Barber 幫你剪。諗住反正都咁抵，慫恿佢做埋個Shave and shape - 1,500泰銖(約HK$380）～唔想返到香港佢會後悔。

向來鍾情英式嘢嘅我已經對呢間店充滿心心眼，可惜理髮店只為男士服務～女士們只可以坐係隔離睇住另一半享受咁正嘅Services。不過店員都好好，睇你等緊嘅期間，佢會免費為你送上威士忌～等你醉住咁等，時間會過得快啲～～

終於到Master上場，於剪髮之前佢會同你溝通好，問清楚你想要乜嘢Style，想剪幾多等等～

當佢同你溝通好之後，就會開始幫你洗頭～成張凳180度轉～唔使行去洗頭，就咁瞓喺度就搞店～～

洗完頭，當然就梗係即刻剪頭髮啦～ 不過呢Part都係普通嘅剪頭髮，無乜特別好講～

因為我哋買咗剃鬚嗰個Package，所以Master會先剪完個頭，再幫洪生剃鬚～首先做個勁舒服嘅Face Massage 先。

用條熱辣辣嘅毛巾幫你敷面，可以幫助血液循環，毛孔擴張，陣間剃鬚都會剃得乾淨啲～

跟住佢就會再用按摩油，幫你做面部按摩。

(呢個毛聞，我梗係喪影佢相～～反正佢舒服到瞓死咁款～我喺隔離做乜都唔知～)

唔係講笑，我就咁睇都睇到想瞓～～好似真係好舒服咁～

幫你按摩完之後佢就開始用刀片剃鬚啦～～

係剃之前，我多口問左我老公一句：「你有冇睇過 Johnny Depp 套《魔街理髮師》（Sweeney Todd），你知唔知戲入邊啲人係點死？」

嚇到佢即刻叫我收聲😂

Master佢手起刀落，成個剃鬚過程大約10至15分鐘就搞掂～

剃完鬚之後佢仲會即刻同你塗Face Cream，等皮膚冇咁刺激～

我後尾問返我老公有乜嘢感覺，佢話整個剃鬚過程都好舒服，不過係間中有少少吉同拿拿地，尚算可以接受～但剃完之後佢即刻摸下自己塊面，忍唔住大叫：「噢～好滑呀。」佢誇張嘅表情，我直頭想扮唔識佢😂

完哂整個過程，Master就會幫你Gel番個英式紳士頭～～

呢個粒打卡咁正，梗係要影一影留念啦～～

剪完個頭，就梗係出番出面睇西裝同皮鞋啦～

呢到啲皮鞋同西裝一樣，全部都可以度身訂造～又可以玩Mix & Match，造對專屬你個人嘅鞋款。

就連牛仔褲都可以度身訂造呀～由美國到日本嘅布料都有，當然價錢就梗係貴啲啦，大約$1800起跳，而整個度造過程需要兩星期，留唔到咁耐？唔緊要～造起咗可以選擇直郵寄番香港㗎嘛～～

【Truefitt and Hill - England】

地址： 1/F, Gaysorn Village, 999 Phloen Chit Rd

營業時間：10am-8pm

電話：+66 84 512 6642

BTS Chit Lom站出往Central World 中央世界購物中心方向

*記得想去試剪髮服務要預先打去預約啊❤️